من كام يوم كان الفيسبوك كله مشغول بهشتاج# مصر_بتنضف .. وقصة ال ٩ وزراء الحاليين وال ٣ إعلامين المشهورين، وأنباء عن تقديم الوزارة لإستقالتها. وفجأة .. مات الهشتاج .. وبعد ما كانوا ٩ وزراء .. بقى وزير واحد بس هو اللي شايل الليلة!! وأنباء عن تشكيل وزاري جديد ومحدش يعرف ليه؟؟ هل عشان الوزرا كلهم طلعوا مرتشين ولا في منهم الأبرياء والمظلومين؟؟ طيب لو فعلا مرتشين مش من حقنا نعرفهم ونحاسبهم ولا حيطلعوا بمكافأة نهاية الخدمة عادي ويصيفوا في مارينا وشارم ونعيش طول عمرنا مش فاهمين !!
لكن للأسف كالعادة محدش فاهم حاجة!!
وكل اللي بيحصل أننا نزيط في الزيطة ونهيص ونسقف ونشتم في بعض لو حد حب يفهم مين راح فين وليه وعمل إيه ونرد عليه بعصبية #مصر_بتنضف إنت إيه مبتعرفش تفرح!! أو عشان نخلص من كآبته نرزعه البلوك المتين!!
وسرحت شوية وافتكرت احداث آليمة مرت أدامنا كلنا زي شريط السينما.. ذكريات نسيناها بتعيد نفسها من تاني!!
ماهو ياما دقت على الراس طبول .. وأسماء بتلمع اتصنفوا خونة وحرامية وفي الآخر وش الضيف .. طلعت زوبعة في فنجان .. وكلاكيت من أول وجديد وعاشو في تبات ونبات .. وبكره تلاقيهم نواب في البرلمان!!
عارفين مصر حتنضف امتى؟؟
لما الكل يعيش تحت مظلة القانون مش فوقة من ابن الوزير لإبن الغفير واللي له حق بكل حرية وعدل يطالب بيه ومش لازم يكون مسنود!!
مصر حتنضف ..
لما نحس بالأمان مع كل مسئول في مكانة وإنه يوم ماحلف اليمين كان فعلاً ولاءه لبلده مش لفيلا في التجمع وكام بدلة ماركة ولا عشان حجب يجيب أرض الصحراوي فلبس في الحيط مع الحيتان الشريرة!!
مصر حتنضف ..
لما علاء وجمال وعز وعزمي ونظيف وسرور وصفوت والعادلي … إلخ يرجعوا يتحاكموا من اول وجديد من غير لا تسويات ولا طبيخ بالنكهات!!
مصر حتنضف ..
لما نسمع ونحقق في كل اللي بيتقال هنا وهناك عن كل وزير أو مسئول نايم قايم واكل أكل الجعان ومطمن بالحصانة والكام مسئول اللي ساندينه!!
مصر حتنضف ..
لما تردوا الحق اللي واضح زي الشمس لمستحقيه وتمسحوا دموع طالبة الصفر ٪ مريم ملاك تادرس وغيرها بدل ماتضيعوا مستقبلها وتقتلوا حلمها عشان طبخة اتظبطت لصالح طالب فاشل مسنود!!
مصر حتنضف ..
لما تساندوا الضحية المتحرش بها ولو حبت تتنازل عن حقها تمنعوها مش تتحايلوا عليها عشان تتنازل لانه المتحرش مسنود والحجة من أجل أطفاله ومستقبله مع أنه لو كان شخص عادي كان اتسحل في ميدان عام!!
مصر حتنضف ..
لما تساندوا المجني عليها مهما كان وضعها الإجتماعي مش عشان واصلة أو معاها واسطة، لما نبطل نقول إيه اللي وداها هناك، ولا شوفوا لبسها عامل إزاي!!
مصر حتنضف ..
لما تنضفوا الصحف والإذاعة والتلفزيون وبرامج التوك شو من أسماء عجيبة فجأة نطوا علينا بالجاه والمحسوبية، وهما فاقدين لمعنى الضمير وشغالين تسميم لعقول الغلابة اللي مصدقينهم وفي الآخر يطلعوا شوية نصابين!!
مصر حتنضف ..
لما نتكلم من غير مانخاف نتمسك واحنا نازلين المطار ولا واحنا خارجين من البلد وتعرفوا أننا مش بنكرهكم ولا بينا عدواة شخصية كل الحكاية نفسنا بلدنا تكون أحسن بلد في الدنيا ونرفع راسنا أدام كل البلدان!!
مصر حتنضف ..
لما الشفافية تستمر من أول القضية لصدور الحكم فيها، مش فقط في أول فرقعة وفي الأخر نلاقيها زوبعة في فنجان!!
مصر حتنضف ..
لما ننبطل نقول على عامل النظافة زبال، ونفهم اننا من غيره حنعيش في مزبلة احنا اللي خلفناها ومن حقه علينا نحترم حقوقه ولما ابنه يكون متفوق يتعامل زي ابن البيه والوزير ويختار السلك اللي عايزه مش يطلع علينا اللي يقوله “آبن الزبال ميدخلش القضاء”!!
ونبطل نستثني اولاد الكبار من التوزيع الجعرافي في الجامعات!!
مصر حتنضف ..
لما تعيدوا توزيع العدل في المرتبات، لما استاذ الجامعة اللي عاش حياته أبحاث وترقيات يلاقي مكان في بلده ويعيش وأولاده حياة كريمة وميحتجش يتغرب عشان يكفي مصاريفه!!
مصر حتنضف ..
لما امشي في بلد الغربة وانا رافعة راسي ومطمنة اني راجعه قريب لبلدي أكمل فيها بقيه حياتي ومستقبل أولادي، مش قلقانة من كفيلي لأني خايفة أرجع ملاقيش مصاريفهم!!
مصر حتنضف ..
لما تنضف مكانك بعد ماتخلص أكلك وترميه في أقرب سلة تقابلك مش تعتمد إن فيه واحد حيجي يشيل وراك!!
مصر حتنضف ..
لما نعلم ولادنا احترام الدور واحترام الضعيف واحترام الكبير وأن سياسة البقاء للأقوى ده هناك في الغابة بس للحيوانات!!
مصر حتنضف ..
لما ابناء الصعيد والوجه البحرى يكون ليهم الحق في كلية الاعلام والعلوم السياسية والاقتصاد، زيهم زي ببتوع البندر!! طالما مش قادرين نبني كليات مماثلة في محافظاتهم، وكفاية إعاقة لأحلام شبابنا!!
مصر حتنضف ..
لما انا وأنت وهو وهي ننتصر على خوفنا وخجلنا من اننا نطالب بحقوقنا أو حق أولادنا خوفاً من الفضايح ورأي المجتمع والناس، وقتها فقط المجرم حيخاف مني ومنك وحيعمل حساب ألف مرة لكل مرة يحاول يقرب مني ومنك!!
عارفين مصر حتنضف إمتى؟؟
مش بخبر وفرقعة في جريدة ولا إذاعة وتلفزيون .. ولا لما تخرسني وتكتم الصوت عشان نداري على المرتشي مهما كانت الأسباب .. ولا لما كل شوية نشيل زيد ونحط عبيد من غير مانفهم ليه!!
مصر حتنضف لما نفهم كلنا ليه ..
لما يفهم الوزير أن حق الفقير إنه يبات شبعان مش كفايه نرميله الفتات!!
وقبل مايبني في شارم يتأكد أن مفيش في بلده عريان!!
ويتحاسب سيادته زيه زي الغلبان من غير تعتيم ولا محاباه!!
